பேரணாம்பட்டு அருகே மின்வேலியில் சிக்கி தந்தை, மகன் பரிதாப பலி

வேலூர் மாவட்டம் பேரணாம்பட்டு அருகே பல்லலகுப்பம் கிராமம் துலுக்கன்குட்டை பகுதியைச் சேர்ந்தவர் ரங்கநாதன். இவர் தனது விவசாய நிலத்தில் குடும்பத்துடன் வசித்து வந்தார். இவரது மகன் சுரேஷ் கறவை மாடுகளை வளர்த்து வந்தார். இந்நிலையில், விவசாயப் பயிர்களை காட்டுப்பன்றிகளிடமிருந்து பாதுகாக்க ரங்கநாதன் தனது நிலத்தில் மின்வேலி அமைத்திருந்தார். இந்நிலையில், நேற்று மாலை பெய்த பலத்த மழை நின்ற பிறகு, மின்வேலி அருகே இருந்த அன்னக்கூடையை எடுக்கச் சென்ற ரங்கநாதன் மீது மின்சாரம் பாய்ந்ததில் சம்பவ இடத்திலேயே உயிரிழந்தார். இதனைப் பார்த்த அவரது மகன் சுரேஷ், தென்னை மட்டையைப் பயன்படுத்தி தந்தையைக் காப்பாற்ற முயன்ற போது அவரையும் மின்சாரம் தாக்கியது. இதில் சுரேஷும் பரிதாபமாக சம்பவ இடத்திலையே உயிரிழந்தார். இந்த தகவலறிந்து வந்த போலீசார் இருவரது உடல்களையும் மீட்டு குடியாத்தம் அரசு மருத்துவமனைக்கு பிரேதப் பரிசோதனைக்காக அனுப்பி வைத்தனர். இது குறித்து போலீசார் விசாரணை நடத்தி வருகின்றனர்.