பிரசவத்திற்குப் பின் பெண் உயிரிழப்பு – உறவினர்கள் போராட்டம்

விருதுநகர் மாவட்டம் சிவகாசி சாட்சியாபுரத்தைச் சேர்ந்தவர் தினேஷ்பாபு. இவரது மனைவி ஐஸ்வர்யா. இவர் மனைவி இரண்டாவது முறையாகக் கர்ப்பமானார். பிரசவத்திற்காக சிவகாசி அரசு மருத்துவமனையில் அனுமதிக்கப்பட்ட அவர், மேல் சிகிச்சைக்காக விருதுநகர் அரசு மருத்துவக் கல்லூரி மருத்துவமனைக்கு மாற்றப்பட்டார். அங்கு அறுவை சிகிச்சை மூலம் அவருக்குப் பெண் குழந்தை பிறந்தது. ஆனால், குழந்தை பிறந்த ஒரு மணி நேரத்திற்குள் ஐஸ்வர்யாவுக்குத் திடீரென உடல்நலக் குறைவு ஏற்பட்டது. இந்நிலையில், மருத்துவர்கள் தீவிர சிகிச்சை அளித்தும் அவர் சிகிச்சை பலனின்றி உயிரிழந்துள்ளார். இதனால் அதிர்ச்சியடைந்த குடும்பத்தினரும் உறவினர்களும், மருத்துவர்களின் கவனக்குறைவே மரணத்திற்குக் காரணம் எனக் குற்றம் சாட்டி உள்ளனர். மேலும், இச்சம்பவம் குறித்து உரிய விசாரணை நடத்தி நடவடிக்கை எடுக்கக் கோரி, விருதுநகர் அரசு மருத்துவமனை வளாகத்தில் 50-க்கும் மேற்பட்டோர் முற்றுகைப் போராட்டத்தில் ஈடுபட்டனர். இந்த தகவலறிந்து வந்த போலீசார் பேச்சுவார்த்தை நடத்தியதைத் தொடர்ந்து போராட்டம் கைவிடப்பட்டது.