தென்காசி கூட்டுறவுத் துறையின் புதிய திட்டம் தொடக்கம் - ரூ.200-க்கு 10 வகை மளிகைப் பொருட்கள்

தென்காசி மாவட்டத்தில் பொதுமக்களுக்கு குறைந்த விலையில் அத்தியாவசிய மளிகைப் பொருட்கள் கிடைக்கும் வகையில் கூட்டுறவுத் துறை சார்பில் புதிய திட்டம் அறிமுகப்படுத்தப்பட்டுள்ளது. இதையடுத்து, 10 வகையான மளிகைப் பொருட்கள் அடங்கிய தொகுப்பு ரூ.200-க்கு விற்பனை செய்யப்படுகிறது. இந்தத் தொகுப்பில் கடலைப்பருப்பு, புளி, பாசிப்பருப்பு, கடுகு, மிளகாய், உளுந்தம் பருப்பு, தனியா, சீரகம், பூண்டு, சோம்பு உள்ளிட்ட 10 பொருட்கள் மொத்தம் 1,450 கிராம் எடையில் இடம்பெற்றுள்ளன. மேலகரத்தில் உள்ள கூட்டுறவு மொத்த விற்பனை பண்டக சாலையில் இத்திட்டத்தை மாவட்ட ஆட்சியர் டாக்டர் மோனிகா ராணா தொடங்கி வைத்தார். மேலும், தென்காசி, கடையநல்லூர், சங்கரன்கோவில், சிவகிரி ஆகிய பகுதிகளில் உள்ள கூட்டுறவு சுயசேவை விற்பனை நிலையங்களிலும் இந்தத் தொகுப்பு கிடைக்கும்.வெளிச்சந்தையைவிடக் குறைந்த விலையில் தரமான மளிகைப் பொருட்களை வழங்குவதே இத்திட்டத்தின் நோக்கம் என அதிகாரிகள் தெரிவித்துள்ளனர். குடும்பச் செலவைக் குறைக்க உதவும் இந்தத் திட்டத்தால் பொதுமக்கள் பயனடைவார்கள் என எதிர்பார்க்கப்படுகிறது.