த.வெ.க. அரசைக் கண்டித்து துறையூரில் 18-ந்தேதி அதிமுக ஆர்ப்பாட்டம் - எடப்பாடி பழனிசாமி அறிவிப்பு

அதிமுக பொதுச்செயலாளர் எடப்பாடி பழனிசாமி வெளியிட்டுள்ள அறிக்கையில், துறையூர் தொகுதி சட்டமன்ற உறுப்பினரும், துணை சபாநாயகருமான ரவிசங்கர் மீது கடுமையான குற்றச்சாட்டுகளை முன்வைத்துள்ளார். சமூகச் செயல்பாட்டாளர் கார்த்திக் குமார், தனது குறைகளைத் தெரிவிப்பதற்காக ரவிசங்கரைச் சந்திக்கச் சென்ற போது, அவர் கொடூரமாகத் தாக்கப்பட்டதாகவும், அவதூறான வார்த்தைகளால் திட்டப்பட்டதாகவும் எடப்பாடி பழனிசாமி தெரிவித்துள்ளார். இந்தச் சம்பவம் தமிழக மக்களிடையே அச்சத்தை ஏற்படுத்தியுள்ளதாகவும் கூறியுள்ளார்.மேலும், சம்பவம் தொடர்பான ஆதாரங்கள் வெளியானதைத் தொடர்ந்து, கார்த்திக் குமாரை மீண்டும் மிரட்டி, நடந்த சம்பவம் பொய் என சமூக வலைதளங்களில் பதிவிட வைத்ததாகவும் குற்றம் சாட்டியுள்ளார். இந்த விவகாரத்தில் முதலமைச்சர் விஜய் மவுனம் காப்பதாகவும் விமர்சித்துள்ளார். துணை சபாநாயகர் ரவிசங்கர் மீது உரிய நடவடிக்கை எடுக்காமல் இருக்கும் த.வெ.க. அரசைக் கண்டித்தும், அவர் மீது கடும் நடவடிக்கை எடுக்க வலியுறுத்தியும், வரும் 18-ந்தேதி காலை 10 மணிக்கு துறையூர் பேருந்து நிலையம் அருகே உள்ள அண்ணா சிலை பகுதியில் அதிமுக சார்பில் கண்டன ஆர்ப்பாட்டம் நடைபெறும் என அறிவித்துள்ளார். இந்த ஆர்ப்பாட்டம் அதிமுக துணைப் பொதுச்செயலாளரும், முன்னாள் அமைச்சருமான கே.பி.முனுசாமி தலைமையில் நடைபெறும். திருச்சி புறநகர் வடக்கு மாவட்டச் செயலாளர் யோகநாதன் முன்னிலை வகிப்பார் என்றும் தெரிவித்துள்ளார்.