வள்ளியம்மாள்புரத்தில் ரேஷன் கடை அமைக்க பொதுமக்கள் கோரிக்கை

தூத்துக்குடி மாவட்டம் வள்ளியம்மாள்புரம் கிராமத்தில் 150-க்கும் மேற்பட்ட குடும்பங்கள் வசித்து வருகின்றனர். இங்கு ரேஷன் கடை இல்லாததால், சுமார் 5 கிலோமீட்டர் தொலைவில் உள்ள பன்னம்பாறை கிராமத்திற்கு சென்று பொதுமக்கள் ரேஷன் பொருட்களை வாங்கும் நிலை உள்ளது. இந்நிலையில், பேருந்து வசதியும் இல்லாததால் பெண்கள், குழந்தைகள் மற்றும் முதியவர்கள் கடும் சிரமத்திற்கு ஆளாகி வருவதாக கூறப்படுகிறது. தங்கள் பகுதியில் ரேஷன் கடை அமைக்கக்கோரி பலமுறை மனு அளித்தும் நடவடிக்கை எடுக்கப்படவில்லை என பொதுமக்கள் தெரிவித்துள்ளனர். இதையடுத்து, பாஜக நிர்வாகிகள் தலைமையில் இன்று வள்ளியம்மாள்புரம் பொதுமக்கள் தூத்துக்குடி மாவட்ட ஆட்சியர் அலுவலகத்தை முற்றுகையிட்டு போராட்டத்தில் ஈடுபட்டனர். தங்கள் கிராமத்தில் உடனடியாக ரேஷன் கடை அமைக்க மாவட்ட நிர்வாகம் நடவடிக்கை எடுக்க வேண்டும் என கோரிக்கை விடுத்தனர்.