நாமக்கல்லில் திமுக மகளிர் அணி கண்டன ஆர்ப்பாட்டம் – விலைவாசி உயர்வைக் கண்டித்து முழக்கம்

தமிழகத்தில் சட்டம் - ஒழுங்கு சீர்கேடு, பெண்களுக்கு எதிரான வன்முறைகள், குழந்தைகள் கடத்தல், போதைப் பொருள் விற்பனை மற்றும் அத்தியாவசியப் பொருட்களின் விலைவாசி உயர்வு உள்ளிட்ட பிரச்சினைகளைக் கண்டித்து, திமுக மகளிர் அணி சார்பில் தமிழகம் முழுவதும் மாவட்டத் தலைநகரங்களில் கண்டன ஆர்ப்பாட்டம் நடைபெற்றது. நாமக்கல் பூங்கா சாலையில் திமுக மகளிர் அணியினர் சார்பில் கண்டன ஆர்ப்பாட்டம் நடைபெற்றது. இதில் ஏராளமான பெண்கள் மற்றும் கட்சியினர் கலந்து கொண்டு தமிழக அரசுக்கு எதிராக கண்டன முழக்கங்களை எழுப்பினர். அப்போது, தமிழகத்தில் பெண்களின் பாதுகாப்பு கேள்விக்குறியாகி உள்ளதாகவும், சட்டம்-ஒழுங்கு பாதிக்கப்பட்டுள்ளதாகவும் ஆர்ப்பாட்டத்தில் பங்கேற்றவர்கள் குற்றம் சாட்டினர். மேலும், அத்தியாவசியப் பொருட்களின் விலைகள் தொடர்ந்து உயர்ந்து வருவதால் ஏழை, எளிய மற்றும் நடுத்தர மக்கள் பெரும் சிரமத்திற்கு உள்ளாகி வருவதாக தெரிவித்தனர். குறிப்பாக, சமையல் பொருட்கள் உள்ளிட்ட அத்தியாவசியப் பொருட்களின் விலைகள் விண்ணைத் தொடும் அளவிற்கு உயர்ந்துள்ளதாக முழக்கமிட்டனர். பொதுமக்களின் வாழ்வாதாரத்தைப் பாதிக்கும் பிரச்சினைகளுக்கு அரசு உரிய நடவடிக்கை எடுக்க வேண்டும் என்றும் வலியுறுத்தினர்.