சாலையில் நடந்து சென்ற பெண்ணிடம் 5 பவுன் தங்கச் சங்கிலி பறிப்பு - மர்ம நபர்களுக்கு போலீசார் வலைவீச்சு

சேலம் மாவட்டம் குகை மாரியம்மன் கோவில் மெயின் ரோடு பகுதியைச் சேர்ந்தவர் வேல்ராஜ். இவரது மனைவி தனலெட்சுமி. இவர் நேற்றிரவு அப்பகுதியில் உள்ள செல்போன் கடை அருகே நடந்து சென்று கொண்டிருந்தார். அப்போது இருசக்கர வாகனத்தில் வந்த இரண்டு மர்ம நபர்கள், கண்ணிமைக்கும் நேரத்தில் அவரது கழுத்தில் அணிந்திருந்த 5 பவுன் தங்கச் சங்கிலியைப் பறித்துச் சென்றனர். இதனால் அதிர்ச்சியடைந்த தனலெட்சுமி கூச்சலிட்டார். அவரது சத்தம் கேட்டு அப்பகுதி மக்கள் ஓடி வருவதற்குள் மர்ம நபர்கள் மோட்டார் சைக்கிளில் மின்னல் வேகத்தில் தப்பிச் சென்றனர். இது குறித்து தனலெட்சுமி செவ்வாய்ப்பேட்டை காவல் நிலையத்தில் புகார் அளித்தார். அந்த புகாரின் பேரில் சம்பவ இடத்திற்கு விரைந்து வந்த போலீசார் விசாரணை மேற்கொண்டனர். மேலும், தனலெட்சுமி அளித்த அடையாளங்களின் அடிப்படையில் மர்ம நபர்களைத் தேடி வருகின்றனர். அப்பகுதியில் உள்ள கண்காணிப்பு கேமரா பதிவுகளையும் ஆய்வு செய்து போலீசார் தொடர்ந்து விசாரணை நடத்தி வருகின்றனர்