வீடுகள் அங்கன்வாடியை சேதப்படுத்திய யானைகள்

கோயம்புத்தூர் மாவட்டம் வால்பாறை அருகே மளுக்கப்பாறை எஸ்டேட் பகுதியில் உள்ள ஆள் இல்லாத வீடுகளுக்குள் புகுந்த யானைகள், அங்கிருந்த உணவுப் பொருட்களைத் தேடி சேதப்படுத்தின. இதனால் வீடுகளில் இருந்த பொருட்கள் சேதமடைந்தன. இந்நிலையில், நேற்று அதிகாலை அப்பகுதியில் உள்ள அங்கன்வாடி மையத்திற்குள் புகுந்த யானைகள், அதன் கதவு, ஜன்னல்களை உடைத்தன. மேலும், சுவர்களையும் இடித்து, உள்ளே இருந்த பொருட்களைச் சேதப்படுத்தின. இது குறித்து தகவலறிந்த வனத்துறையினர் சம்பவ இடத்திற்குச் சென்று, அங்கு முகாமிட்டிருந்த யானைகளை விரட்டும் பணியில் ஈடுபட்டனர். அப்போது, யானைகள் தொடர்ந்து அதே பகுதியில் முகாமிட்டுள்ளதால், எஸ்டேட் பகுதியில் வசிக்கும் தொழிலாளர்கள் அச்சத்தில் உள்ளனர். யானைகள் மீண்டும் குடியிருப்புப் பகுதிகளுக்குள் புகுந்து சேதங்களை ஏற்படுத்தக்கூடும் என அவர்கள் கவலை தெரிவிக்கின்றனர்.எனவே, யானைகள் குடியிருப்புப் பகுதிகளுக்குள் நுழைவதைத் தடுக்க வனத்துறையினர் உரிய நடவடிக்கை எடுக்க வேண்டும் என்றும், தொழிலாளர்களின் பாதுகாப்பை உறுதி செய்ய வேண்டும் என்றும் அப்பகுதி மக்கள் கோரிக்கை விடுத்துள்ளனர்.