திமிரியில் இருவர் கைது – 12 இருசக்கர வாகனங்கள், தங்க நகைகள் பறிமுதல்

இராணிப்பேட்டை மாவட்டம், திமிரி அருகே தாமரைப்பாக்கம் சோதனைச் சாவடியில் திமிரி போலீசார் வாகனத் தணிக்கையில் ஈடுபட்டிருந்தனர். அப்போது, அந்த வழியாக வந்த இருவரைப் பிடித்து போலீசார் விசாரணை நடத்தினர். அதில், ஆனைமல்லூரைச் சேர்ந்த தனசேகர், பாராஞ்சியைச் சேர்ந்த ஆறுமுகம் என்பது தெரிய வந்தது. இருவருக்கும் மாவட்டத்தின் பல்வேறு பகுதிகளில் நடைபெற்ற குற்றச் சம்பவங்களில் தொடர்பு இருப்பதும் விசாரணையில் தெரிய வந்ததாக போலீசார் தெரிவித்தனர். இதையடுத்து, அவர்களிடம் நடத்திய விசாரணையின் அடிப்படையில், பல்வேறு பகுதிகளில் திருடப்பட்ட 12 இருசக்கர வாகனங்கள், ஒரு சவரன் தங்கக் கம்மல் மற்றும் ஒன்றரை சவரன் தங்கச் சங்கிலி ஆகியவற்றை போலீசார் பறிமுதல் செய்தனர். இதையடுத்து, பறிமுதல் செய்யப்பட்ட சொத்துகளின் மொத்த மதிப்பு ரூ.4.35 லட்சம் எனக் கூறப்படுகிறது. போலீசாரின் தகவலின்படி, தனசேகர் இருசக்கர வாகனங்களைத் திருடி, தலா ரூ.3,000-க்கு ஆறுமுகத்திடம் விற்பனை செய்து வந்துள்ளார். மேலும், விளாப்பாக்கம் பகுதியில் உதவித்தொகை பெற்றுத் தருவதாகக் கூறி மூதாட்டியிடம் ஒரு சவரன் கம்மலையும், பாணாவரம் பகுதியில் குடிநீர் கேட்பது போல் நடித்து பெண்ணிடம் ஒன்றரை சவரன் தங்கச் சங்கிலியையும் பறித்துச் சென்றுள்ளனர். இதையடுத்து, கைது செய்யப்பட்ட தனசேகர் சரித்திரப் பதிவேடு குற்றவாளி என போலீசார் தெரிவித்தனர். இருவரையும் கைது செய்த போலீசார் நீதிமன்ற நடவடிக்கைக்குப் பிறகு சிறையில் அடைத்தனர்.