செவிலியர் போராட்டத்தில் திமுகவினருக்கு என்ன வேலை - அமைச்சர் நிர்மல் குமார் கேள்வி

சென்னையில் செய்தியாளர்களை சந்தித்த அமைச்சர் நிர்மல் குமார், செவிலியர்கள் நடத்தி வரும் போராட்டத்தில் திமுக முன்னாள் அமைச்சர் மனோ தங்கராஜ் பங்கேற்பது குறித்து கேள்வி எழுப்பினார். இதையடுத்து, போராட்டங்களுக்கு அனுமதி வழங்கப்படவில்லை என்ற தகவல் தவறானது என்றும், அனுமதி உள்ள இடங்களில் போராட்டம் நடத்த போலீசார் அனுமதி வழங்கி வருவதாகவும் அவர் தெரிவித்தார்.மேலும், செவிலியர்கள் போராட்டத்தில் திமுக முன்னாள் அமைச்சர் மனோ தங்கராஜ் பங்கேற்று, போராட்டத்தை அரசியலாக்க முயற்சிப்பதாக அமைச்சர் குற்றம் சாட்டினார்.செவிலியர் போராட்டத்திற்கும் மனோ தங்கராஜுக்கும் என்ன தொடர்பு என்றும், அவர் அந்தத் துறையின் அமைச்சராக இருந்தாரா என்றும் கேள்வி எழுப்பிய நிர்மல் குமார், அவருடன் அரசு ஏன் பேச்சுவார்த்தை நடத்த வேண்டும் எனவும் தெரிவித்தார். இதையடுத்து, தமிழகத்துக்கு மத்திய தொகுப்பில் இருந்து வரவேண்டிய மின்சாரம் கிடைக்காததால், மின் பற்றாக்குறையை சமாளிக்க வெளிச்சந்தையில் இருந்து மின்சாரம் கொள்முதல் செய்ய டெண்டர் கோரப்பட்டுள்ளதாகவும் அமைச்சர் தெரிவித்தார். மேலும், அடுத்த ஆண்டு கோடை காலத்தில் மின் தேவை அதிகரிக்கும் என்பதால், முன்னெச்சரிக்கை நடவடிக்கையாக இந்த முடிவு எடுக்கப்பட்டுள்ளதாகவும் நிர்மல் குமார் கூறினார்.