லாரி ஓட்டுநர்களிடம் கத்தியை காட்டி பணம் பறிக்க முயன்ற மூவர் கைது

திண்டுக்கல் மாவட்டம் வேடசந்தூர் அருகே எரியோடு நல்லமன்னார்கோட்டை மாரம்பாடி பகுதியில், கத்தியை காட்டி லாரி ஓட்டுநர்களிடம் பணம் பறிக்கும் கும்பல் நடமாடுவதாக போலீசாருக்கு ரகசிய தகவல் கிடைத்தது. இதையடுத்து போலீசார் தீவிர ரோந்துப் பணியில் ஈடுபட்டனர். அப்போது காரில் வந்த 4 பேர், வாள் மற்றும் கத்திகளைக் காட்டி லாரியை வழிமறித்து ஒட்டுநரிடம் பணம் கேட்டு மிரட்டினர். பின்னர்,போலீசாரைக் கண்டதும் ஒருவர் தப்பியோடினார். இந்நிலையில், மற்ற 3 பேரை போலீசார் பிடித்து கைது செய்தனர். அந்த விசாரணையில் அவர்கள் திண்டுக்கல்லை சேர்ந்த சிவசூர்யா, ஸ்டேனிஸ், எரியோடு நாயக்கனூரை சேர்ந்த முத்துப்பாண்டி என்பது தெரிய வந்தது. அவர்களிடமிருந்து 2 வாள் கத்திகள் பறிமுதல் செய்யப்பட்டன. இதை தொடர்ந்து கைது செய்யப்பட்ட மூவரும் சிறையில் அடைக்கப்பட்டனர்.