சங்கரன்கோவிலில் பட்டா கேட்டு பொதுமக்கள் முற்றுகை

தென்காசி மாவட்டம் சங்கரன்கோவிலில், வழங்கப்பட்ட வீட்டு மனைப் பட்டாக்களை கணினியில் பதிவேற்றம் செய்யக் கோரி, திருவள்ளுவர் நகர் மற்றும் திருவுடையான் சாலை முதலாவது தெருவைச் சேர்ந்த பொதுமக்கள் கோட்டாட்சியர் அலுவலகத்தை முற்றுகையிட்டுப் போராட்டத்தில் ஈடுபட்டனர். இப்பகுதியில் 300 குடும்பங்கள் கடந்த 70 ஆண்டுகளுக்கும் மேலாக வசித்து வருகின்றனர். இவர்களுக்கு இலவச வீட்டு மனைப் பட்டா வழங்கப்பட்டு, நகர நிலவரி திட்டத்தின் கீழ் புதிய புல எண்களும் ஒதுக்கப்பட்டன. ஆனால், 300 பேரின் பட்டாக்களும் இணையதளத்தில் பதிவேற்றம் செய்யப்படாததால், பத்திரப்பதிவு செய்வதிலும் அரசின் நலத்திட்ட உதவிகளைப் பெறுவதிலும் சிக்கல் ஏற்பட்டுள்ளதாகப் பொதுமக்கள் தெரிவித்தனர். இதையடுத்து, பட்டாக்களை உடனடியாகக் கணினியில் பதிவேற்றம் செய்ய வலியுறுத்தி, கோட்டாட்சியர் அனிதாவிடம் மனு அளித்தனர். இதையடுத்து, பல ஆண்டுகளாக வசித்து வந்தும், பட்டா இணையதளத்தில் பதிவேற்றம் செய்யப்படாததால் தங்களது குடியிருப்புப் பகுதிகள் தொடர்ந்து புறம்போக்கு நிலமாகவே இருப்பதாகப் பொதுமக்கள் கவலை தெரிவித்தனர்.