கோவை மத்திய சிறை வளாகத்தில் இருந்து கைதி தப்பியோட்டம்

கோவை மாவட்டம் அன்னூர் பகுதியைச் சேர்ந்த ராகவன் என்பவர் வழிப்பறி வழக்கில் கைது செய்யப்பட்டார். இதையடுத்து அவர் நீதிமன்றத்தில் ஆஜர்படுத்தப்பட்டார். பின்னர், நீதிமன்ற உத்தரவின் அடிப்படையில் அவரை சிறையில் அடைப்பதற்காக கோவை மத்திய சிறைக்கு போலீசார் அழைத்து வந்தனர். கோவை மத்திய சிறையில் இரண்டு அடுக்கு பாதுகாப்பு ஏற்பாடுகள் செய்யப்பட்டுள்ளன. இந்நிலையில், ராகவனை முதல் நுழைவு வாயிலில் இருந்து இரண்டாவது நுழைவு வாயிலுக்கு போலீசார் அழைத்துச் சென்றனர். அப்போது அவரது கையில் போடப்பட்டிருந்த விலங்கை போலீசார் அகற்றினர். அந்த நேரத்தில் திடீரென ராகவன் அங்கிருந்து தப்பியோடினார். இதனால் சிறை வளாகத்தில் பரபரப்பு ஏற்பட்டது. இதையடுத்து, தப்பியோடிய கைதியை விரைவாகப் பிடிப்பதற்காக பந்தயச்சாலை போலீசார் தீவிர தேடுதல் வேட்டையில் ஈடுபட்டு வருகின்றனர். சிறை வளாகத்திலேயே கைதி தப்பியோடிய சம்பவம் அப்பகுதியில் பெரும் பரபரப்பை ஏற்படுத்தியுள்ளது.