கனமழையால் பள்ளி வளாகத்தில் மழைநீர் தேக்கம் – பொதுமக்கள் கோரிக்கை

தமிழகத்தில் வடகிழக்கு பருவமழை தீவிரமடைந்துள்ள நிலையில், கள்ளக்குறிச்சி மாவட்டம் முழுவதும் நள்ளிரவு முதல் தொடர்ந்து கனமழை பெய்து வருகிறது. இதன் காரணமாக பொரசக்குறிச்சி கிராமத்தில் உள்ள ஊராட்சி ஒன்றிய நடுநிலைப்பள்ளி வளாகம் முழுவதும் மழைநீர் புகுந்து தேங்கியுள்ளது. அப்பகுதியில் உள்ள ஏரி நிரம்பியதால், ஓடை வழியாக உபரிநீர் வெளியேறி பள்ளி வளாகத்திற்குள் புகுந்துள்ளது. இன்று ஞாயிற்றுக்கிழமை என்பதால் பள்ளிக்கு வழக்கம்போல் விடுமுறை அளிக்கப்பட்டுள்ளது. இருப்பினும், தொடர்ந்து பெய்து வரும் கனமழையால் பள்ளி வளாகத்தில் நீரின் அளவு அதிகரித்து, வகுப்பறைகளுக்குள் மழைநீர் புகும் அபாயம் ஏற்பட்டுள்ளது. இதனால் பள்ளியின் கட்டிடங்கள் மற்றும் மாணவர்களின் பாதுகாப்பு குறித்து அப்பகுதி மக்கள் கவலை தெரிவித்துள்ளனர். எனவே, சம்பந்தப்பட்ட அதிகாரிகள் உடனடியாக நடவடிக்கை எடுத்து, பள்ளி வளாகத்தில் தேங்கியுள்ள மழைநீரை அகற்றுவதுடன், எதிர்காலத்தில் இது போன்ற பாதிப்புகள் ஏற்படாமல் தடுக்க உரிய வடிகால் வசதிகளை ஏற்படுத்த வேண்டும் என பொதுமக்கள் மற்றும் சமூக ஆர்வலர்கள் கோரிக்கை விடுத்துள்ளனர்.