மதுபானக் கடைகளை திறக்காமல் போராட்டம் – 75 சூப்பர்வைசர்கள் அதிரடியாக சஸ்பெண்ட்

 தமிழகத்தில் மதுபானக் கடைகளில் காலி மதுப்பாட்டில்களை திரும்பப் பெறும் திட்டம் அமல்படுத்தப்பட்டுள்ளது. இதையடுத்து காலி பாட்டில்களை ஒப்படைப்பவர்களுக்கு ரூ.10 வழங்கப்படுகிறது. மேலும், ரூ.1000 மேல் மதுபானம் வாங்குவோருக்கு கியூஆர் குறியீடு மூலம் பணப்பரிவர்த்தனை செய்ய உத்தரவிடப்பட்டுள்ளது. இதற்காக போதிய ஸ்கேனிங் இயந்திரங்கள் வழங்கப்படாததால் பணிச்சுமை அதிகரிப்பதாக ஊழியர்கள் குற்றம் சாட்டினர். பின்னர், காலி பாட்டில்களை திரும்பப் பெறும் பணிக்கு தனியார் நிறுவன ஊழியர்களை நியமிக்க வேண்டும், கூடுதல் ஸ்கேனிங் இயந்திரங்கள் வழங்க வேண்டும் உள்ளிட்ட கோரிக்கைகளை வலியுறுத்தி கடந்த இரண்டு நாட்களாக ஊழியர்கள் போராட்டத்தில் ஈடுபட்டு வருகின்றனர். இந்நிலையில், கிருஷ்ணகிரி மாவட்டத்தில் உள்ள 110 மதுபானக் கடைகளில் பணியாற்றும் 75 சூப்பர்வைசர்களை நிர்வாகம் பணியிடை நீக்கம் செய்துள்ளது.மேலும், தொடர்ந்து கடைகளை திறக்காமல் இருந்தால் விற்பனையாளர்கள் மீதும் நடவடிக்கை எடுக்கப்படும் என எச்சரிக்கை விடுக்கப்பட்டுள்ளது.